Ամերիկեան Յարձակումին Յետաձգումէն Ետք. Հանգիստ Մթնոլորտ` Դամասկոսի Մէջ
Դամասկոսի մէջ «Ազդակ»-ի թղթակիցը երէկ հաղորդեց, որ Դամասկոսի հասարակութեան մօտ բաւական
հանգիստ մթնոլորտ կը տիրէ ամերիկեան յարձակումի յետաձգման լուրերէն ետք, հակառակ անոր
որ վճռակամութեամբ եւ հաստատակամութեամբ կը դիմագրաւէր հարցը: Մայրաքաղաքին մէջ բնական
շարժումը իր տեղը գտաւ: Սուրիական պատկերասփիւռի կայանները միացուած հաղորդումներով
կը ներկայացնեն ազգային երգեր եւ ծրագիրներ: Միւս կողմէ, քաղաքացիական ընկերութեան
մօտ նոր շարժում սկսած է «Մեր մարմիններուն վրայ» անունով, որ անհատական նախաձեռնութեամբ
կազմակերպած է հաւաք մը, որուն մասնակցած անդամները իրենց մարմիններով վահաններ պիտի
դառնան սուրիական զինուորական հիմնարկները պաշտպանելու նպատակով: Հիմնական նպատակը աշխարհին
ուղերձ հասցնելն է, թէ սուրիացի քաղաքացիները ձեռնածալ պիտի չմնան ի տես Սուրիոյ դէմ
կատարուած յարձակումին: Իսկ անցնող երկու օրերուն հրասանդի հրթիռներ ինկան տարբեր
թաղամասերու` Քուտսէայի եւ Ապպասիինի վրայ արձանագրելով վիրաւորներ եւ նիւթական վնասներ:
Միեւնոյն ժամանակ սուրիական բանակը տակաւին կը շարունակէ իր զինուորական գործողութիւնները
կարգ մը արուարձաններուն մէջ: